Alla Itolae Nusa 4
Tamata mere intulu kai eni bina Hawa, eleki Hawa ikeu blublulu kai iruele kwete mokwai, eni nane Kaine eleki bina mere iombe, “TUHANE Itapa au hoko au supu kwete mokwai sae peneka.”
Eleki iruele kwete mokwai sae leneka, eni nane Habela. Habela iono tamata maka pialae domba eleyo Kaine iono tamata maka andinu.
Eleki kena rebai sae me Kaine iriluke bei eni ndinure esi hasile kena palae ete TUHANE.
Eleki Habela lekwe irana domba anai mena sae bei eni dombaru, iribi esi sele buine, eleki iriluke esi oto misetaru kena ipalae ete TUHANE. Hoko TUHANE laleIje ndinake Habela kai eni tanei rebe ipalae eteIje.
Po TUHANE laleIje ndinake Kaine kai eni tanei rebe ipalae eteIje mo. Hoko Kaine oaleleije selue kuru, inasu titinai.
Eleki TUHANE Ibeteke loko Kaine be, “Le mula pine lalemu emusu kai oalalemu ekurure?
Sepo aono misete hoko selu oalalemue, oalale malite. Po sepo aono misete mo, hoko namake lalemu kena ono dosa. Lalemu kena ono dosare suke alulu yake.”
Kaine ibeteke loko kwalini Habela be, “Mai ite keu me neu mina.” Kena esi me neu peneka, Kaine iteta kwalini Habela, eleki ibunui.
Eleki TUHANE Itneu Kaine be, “Kwalimu Habela ietia?” Kaine iralake be, “Au rekwai mo! Aure maka raka kwaliku mo.”
Eleki TUHANE Iombe, “Le mula pine aono yele ntaute mere? AU selu kwalimu eni lalakwe kena tapele, mere saka AU lene naije kloloe lokoKU kena hukume tamata maka bunure.
Aono kwalimu eni lalakwe ponikele kena tapele peneka hoko Au kutuke ale, Au ono arue lilali,
Sepo aatnane kena tapele, asupu hasile sasaisa mo. Aono tamata lilaline rebe amu otoi maka rue mei nusare sae mo.”
Eleki Kaine ibeteke loko TUHANE be, “Hukumane mere blulu kuate, au tahani rua mo.
Asui au bei tapele meije, au lau bei oaMu, au ono tamata lilaline mei nusa, hoko sepo sae itetueku, ibunuku.”
Eleki TUHANE Ibeteke lokoi be, “Mo! Sire pine ibunu ale, esi hukumane sie itua esi supu bunu lekwe.” Eleki Itolae tanda kena Kaine leke sire pine itetuine, ibunui yake.
Eleki Kaine ikeu bei TUHANE oaIje kai irue me tape Note, me Edene esi sapleuke lemataije sare.
Kaine intulu kai eni bina eleki bina mere ikeu blublulu, eleki iruele eni nanae mokwai, esi ono eni nane Henoke. Eleki Kaine ieleke kota sae kai iono kota mere esi nane Henoke lulu eni nanare eni nane.
Eleki Henoke eni nanae kena Irate, Irate eni nanae kena Mehuyaele, Mehuyaele eni nanae kena Metusaele, Metusaele eni nanae kena Lameke.
Eleki Lameke ikai bina lua, sae eni nane Ada kai saere eni nane Sila.
Ada iruele Yabale; kai Yabale eni anubuaru, sie meru pine maka pialae binatane kai maka rue me tendare.
Yabale eni kwalini eni nane Yubale. Yubale eni anubuaru pine maka klemake musike kecapi kai hbue suline.
Kai Sila lekwe iruele kwetele, eni nane Tubal-Kaine. Tubal-Kaine eni anubuaru pine esi ono taneia bei tembaga kai pesi. Tubal-Kaine eni betai eni nane Naama.
Lameke Ibeteke loko eni bina lua meru be,
“Ada kai Sila, lene au lepare:
Au bunu mokwai beluke sae peneka le iteta au eti pakaeku.
Sepo Kaine isupu bunure esi hukumane sie itua esi supu bunu lekwe.
Hoko sepo au supu bunu, esi hukumane sie butu itu lesini itu esi supu bunu lekwe.”Adame intulu kai eni bina eleki eni bina iruele kwete mokwai sae leneka, kai iono eni nane Seta. Hawa iombe, “Alla Iriluke misete titinai ete au hoko Iono au ruele kwetele sae lekwe kena iseli Habela, le Kaine ibunui peneka.”
Eleki Seta eni nanae, esi ono eni nane Enose. Eleki tamata esi tatu loko TUHANE menai bei mere.